Sunday, October 15, 2006

مصيبه!

بسم الله الرحمن الرحيم
 
 
اول شي لا بارك الله في قوقل و لا بيتا بلوقر مادري شسمه : عفسني والله و ماني عارفه ارد طبيعي! اول ما تليقفت و حولت امس و الا اشوف فوق اسمي الكامل: غبراااا هذا شيايبة؟ طلع بكيفهم حطوا معلومات ايميل القوقل في البلوق!
و الاسامي في الكومنتات طالعه انونيموس! و الاسامي العربيه طالعه احرف هيلوغريفيه اففف
 
 
المهم بما انا على مشارف توديع رمضان الله يعوده علينا و عليكم و على جميع المسلمين بالخير ياريت تاخذون من
وقتكم 28 دقيقه تسمعون فيها محاضرة الشيخ نبيل العوضي "نهاية رمضان"
 
 
 
 
و كل رمضان و انتم الى الله أقرب
 
 
----------------------------------
 
 
في سالفة سمعتها امس طبعا تقهر والله و من ناس ثقه .. المهم السالفة و مافيها ان وحده من الامهات طيبه و على نياتها والله قالت حق بنتها العودة شوفي اختج جان عندها شي و الا واجبات .. الاخت الصغيره تقريبا ثانيه متوسط شي جذي ..
قامت الصغيره يابت جنطتها حق اختها .. فجت العودة الجنطه و الا تطلع منها جيس فيه قرشتين! طلعتهم وحده فيها مثل ماي و الثانيه ماي اصفر !! انصعقت و نادت امها "تعبوا على التفاصيل بس"
.. المهم الام اول ما شافت القرشه عبالها تكرمون بول!!
 
يسألون البنت الصغيره شنو هذا؟؟؟ شيايبة جنطتج؟؟ تقولهم مادري!! مو انا اللي حاطته!!
 
خال البنت معاهم في البيت ييه و فجوا القرشه تقول والله ان على بعد وييييين تكفخ براسج ريحه اللي داخله و تخلي راسج عصافير عصافير !
 
خموووووووووووورة ..! لوععععة!
 
طبعا حاولوا بشتى الطرق يعرفون من البنت شنو هذا و شيايبه الجنطه و اهيه على كلمه وحده مادري!
 
البنت الصغيره على قولتهم من أهل الله و من و اهيه ياهل كلش و اهيه نسايه و ما تثبت مسكينه ..
 
المهم الام تقول والله ما غفت عيني ليلتها من الصبح اهيه و الخال رايحين المدرسه حق الناظره و حطوا جدامها هالقراش !
 
نادوا البنت و ابد ابنت على كلمه وحده مادري و لا شفته !
 
قالتلهم الناظره قعدوا شوي برا و خلوني مع البنت بروحنا
و تييبها يمين و يسار و ما اقول حق اهلهج و قوليلي عشان ما ندخل الشرطه بالموضوع و و و و .. اخر شي البنت اعترفت ان فلانه معطيتني اياه من بيتهم!!
 
ردت البنت صفها و نادوا البنت هذي
الام تقول البنت هذي اللي يات لا اله الا الله
طوووووووول الباب و عرضه ! و اثيوبيه بعد شي جذي مو كويتيه .. ! المهم من وين لج هذا و شحقه يايبته و غيره
قالت هذا مشروب ابوي يسويه بالبيت ! و كل يوم احنا نشربه عااادي
و ربع ابوي كل يوم عندنا ايووون البيت و نقعد وياهم و نشربه ويا امي و خواتي و عااادي كلنا نشربه!!
 
 
ياااااااااااااااا لهوي!
 
دقت الناظره على الابو قالها مشغول انا ماقدر ايي !
 
قالتله والله ان ماييت الحين لا الشرطه عندك بدقايق!
 
طبعا هالحجي من الصببببح الام تقول انا بالمدرسه من الساعه 7 الصبح ما شرف الابوا الا الساعه 12 الظهر
 
تقول نشوف الابوا و الا ذاك الريال اللي لحيته لي سره!
و السبحه في ايده!
و الدشداشة لي ركبه!
و الغتره بدون عقاال!
و بين كل كلمه و الثانيه يذكر الله و يسبح و يهلل!!
 
قااالوله شنو هذا!!! قال عادي هذا عصير احنا نسويه في البيت و عادي عندنا اصلا .. عنب مادري شنو و نخمره و نشربه عاااادي
 
المهم تعرفون شلون اليمن عندهم القات شي عادي و طبيعي؟ هذول عندهم هالخمر عادي و طبيعي!!
 
 
طبعا هد فيه الخال و الناظره و شلون و ما لون و الحرام و الحلال و بنتك و المدرسه و غيره
 
 
اللي يحر بالموضوع اكثر .. الناظره قضبت الام و قعدت تفر راسها ان ما تبلغ و هذا صرح تعليمي و مو حلوة بحق المدرسة و العافين عن الناس و غيره
الام طخت و ردت بيتهم خلاص
 
 
طبعا البنت مو عارفين منها لا حق و لا باطل
هل هذي اول مره او لا؟
هل معطيه بنات غيرها او لا؟
هل شربته اصلا و الا لا!!!
 
 
قلنا حق الام يعني الشي اللي يشفع لبنتج ان لو في بالها او تدري شنو هذا جان ما يابتلكم الجنطه و اهوه فيها!! الام قالت بنتي نساااايه و عادي تنسى عمرها ما تنسى بجنطتها هذا !
 
 
طبعا تصرف الام يقههههر ويا الناظره !! المفروض على طووووول يبلغون عن هالريال و عايلته!!
انتوا لاحظتوا "ربع ابوي" كل يوم عندنا!
و عندهم بنات و يهال بالبيت !!
ذنب كل واحد فيهم يدمن على هالشي الحين من برقبته؟؟؟
 
 
شفتوا هالوافدين شييبون لنا و حق عيااالنا!!!
 
 
شبيظمنا ان هذي البنت اصلا مو قاعده تروج حق ابوها و يبيعون هالسم الهاري؟؟
 
 
البنت عندها اخوان و خوات
شيظمن لنا مو كل واحد فيهم قاعد يوزع هالشي في مدرسته و على عيالنا!!!
 
 
لا حول و لا قوة الا بالله!!
 
 
---------------------------------
 
 
سورة السجده من السور اللي فيها معاني و ايات تقشعر لها الابدان
 
 
اسمعوها بصوت الشيخ مشاري العفاسي
و ركزوا في كل كلمه فيها
 
 
 
 
فَذُوقُوا بِمَا نَسِيتُمْ لِقَاء يَوْمِكُمْ هَذَا إِنَّا نَسِينَاكُمْ وَذُوقُوا عَذَابَ الْخُلْدِ بِمَا كُنتُمْ تَعْمَلُونَ
 
 
:(
 
 
تَتَجَافَى جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا وَمِمَّا رَزَقْنَاهُمْ يُنفِقُونَ
 
 
أين نحن منهم؟؟
 
 
فَلَا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاء بِمَا كَانُوا يَعْمَلُونَ
 
 
ياااااااااااااااالله!!!
 
 
أَفَمَن كَانَ مُؤْمِنًا كَمَن كَانَ فَاسِقًا لَّا يَسْتَوُونَ
 
 
لا يستوون لا يستوون لا يستوون!!!!
 
 
اللهم ارحمنا برحمتك أنت أرحم الراحمين!

25 comments:

Cr8ivia said...

princess

المدارس الحكوميه تدخل عيال اللي يشتغلون في المسايد و تدخل عيال مغسلين الموتى و تدخل عيال جم وظيفه ثانيه للاسف الشديد :|
هذا اللي المفروض يصير و طاح لساني و انا اقول و اقنع ان كل شي بيصير ترا ذنب في رقبتها!!!
و في القرآن بما معناه من يكتم شهادة في قلبه فقلبه آآآثم!
اي صرح علمي اي بطيخ هذول خطر علينا و على عيالنا!!

يالله الستر

Flamingoliya said...

allah yahdeehom... wala tha7akt lama gareet enna li7ya oo 7ala oo 3indehom 3adi.

Reem AlOnaizy said...

صج والله هالحجي

ما يصير جذي
ما يصير تسكت الأم
أكيد مو بنتها الوحيدة
ما كان عليها إنها تسكت
@@


و
تشكرات على الروابط
:)

العين الساهرة said...

عش رجباً ترى عجباً، لا حول ولا قوة إلا بالله، بصراحة لا يجب السكوت على هذا الشىء لازم يبلغون الشرطة، إذا صار شىء لاسمح الله حق أى بنت ثانية شنو راح ينفعهم سكوتهم

خطبة الشيخ نبيل العوضى تعور القلب، يارب يتقبل منا في هذا الشهر الفضيل وفي هذه الأيام المباركة

Cr8ivia said...

Flamingoliya

اي والله الله يهديهم و يفكنا من شرورهم
اي والله شر البليه ما يضحك

moklet-choka

اي والله شي ما يتصدق :|
و الله يهدي الام و تبلغ !!

حياج الله (:

العين الساهرة

اي والله الله يتقبل منا امين

حتى بنت الريال هذا ضحيه لمخ ابوها! اخوانها الصغار ضحايا اصلا بعد
ان شاء الله تبلغ .. اتممنى ..

Dakhtour said...

Looooooooooooool 7adhom eftha7oooooch hal google! Bs yalla gat Saleeema ;)

el e3fasy 9ota maynoon o 7ada 9ar mashhooor fe kel mokan :)

Cr8ivia said...

zizotime

هههههه اي والله ياخوي وقفوا قلبي شعرفهم فيني! ههههه!
و العفاسي ماشاء الله عليه الله يبارك له والله عيني عليه بارده :|
حياك الله

سالفة قلب said...

لاحول ولاقوة الا بالله

تكدرت

بوستج وايد يعور القلب

وحطيته سورة وايد اتهزني

يزاج الله خير ويعطيج العافيه

Cr8ivia said...

سالفة قلب

اي والله السالفة تعور القلب و تقهر بس شنسوي :|

الآية سبحان الله تمس القلب وبقوة

حياج الله و عذرينا على التكدير :|

Unknown said...

استغفر الله

انزين ما تعرفون عنوان هذا الخمورجي الفاسق؟؟؟؟؟؟

Cr8ivia said...

عاجل

مادري عن عنوانه شعرفنا فيه :| بس طبعا المدرسه معروفة

الله المستعان :s

Anonymous said...

wlaaa salfaa 3ajeybaaa hal ajaaneb sawoolnaa sowalf 3ajeebaa 3'areybaa fee hal deyraaaa walaa alwa7ed wedaa yeftak meenhom bs lel asaf aldeyraa magamt tamshee bedoonhon lelASAF y3neee alaah ya7fee9' hal deyra al6aybaa oo ya7fe9'naa

Cr8ivia said...

cosimfree911

ee walla allah eykafeena balaweehum! ili mi7tajeena minhum ok ya 7ail allah .. bas tara 3/4hum me7na eb 7ajathum 3ala 3ala eglobna o kil wa7ed yayeb qabelta ma3ah!!!!
حياك الله

myth

والله ما نظمن ان الموضوع عدا على خير
o i cant consider it 3adda untill etbalegh!!

Cr8ivia said...

Kitty

اي والله ماساة ماساة :| و الام فقيره على ويها ما فكرت بعواقب الامور بس الحين ضميرها مأنبها!!
قصوا عليها بسالفة اجر اللي يعفي عن الناس و المدرسة و الفضيحه و بتجرجرون و بنتج و من هالحجي الفاضي من الادارة الموقره!

وااااااااااي امه و ابوه يشوفون !!! لاااا حول و لا قوة الا بالله!!
اذا كان رب البيت للدف ضاربا فشيمه اهل البيت الرقص!
عنبووووكم ماتعرفون تخشون خمالكم و وصخكم بينكممممم!! شذنب هاليهال!!
استغفر الله بلاوي بلاوي!!

الله يستر علينا و يحفظنا والله!!!

حياج الله

نون النساء said...

امبيه من صجج

اشفيها المدارس صايرة جذي
@@

انا خبري قبل على ايامي
اذا بنسوي ذنوب

انييب مشط وقلم حمرة

هالنوووبة قراش خمر


لا حول ولا قوة إلا باالله العلي العظيم

Manooya said...

لوووول شر البلية ما يضحك =\

والله المدارس تخرع

78o8eYa said...

آنا كله طايحه عليج بعز اللويةو العفسه
أمس سيرت عليكم و إلا ألقى الدنيا حوسه
والحجي قالب هيروغليفي
طلعت و آنا أسمي و أكبر عليكم

:))~

أول شي الحمدالله على السلامة ، و خطاكم السو

ثاني شي يزاج الله خير على لنك الشيخ نبيل العوضي

ثالث شي ، و إهني الطامه الكبرى
...
حسبي الله عليهم
هالأم شلون قلبها يطاوعها و تسكت .. و هالناظرة و المدرسة شلون يدفنون السالفه ؟!!؟

السالفه مو هينه بالمره
اذا اليهال قاعدين يسوون فيهم جذيه
شبقى بعد
!!

وسالفة كيتي
مأساة
!!
:/

حسبي الله على أهلهم

ويقولون عيالنا مختربين .. مساكين هالعيال
من اللي يشوفونه و يسونه أهلهم فيهم

الحمدالله و الشكر
يا ربي لا تبلينا و تستر على عيالنا


عوار قلب هالبوست
:S

Cr8ivia said...

نون النساء

ههههههههه والله ضحكتيني على المشط و الحمره! انا اذا بسوي ذنب حدي حدي حدي كنت اتكلم ويا اللي يمي!!!

اي والله الله يستر على عيالنا و يحفظهم

manooya

صاجه الواحد صار ما يأمن على عياله حتى بالمدرسة :|

Cr8ivia said...

78o8eYa

لول انتي تخصص زيارات بالعفسه :| اشوه انج قريتي عليه يامعوده ورد طبيعي
هذا كله من القوقل بيتا الله يغربله عفسني و ييت ارقعها جان اعميها :| بس استوعبت اني عميتها عاد و رديت الانكودينق :S

اي والله ياختي الله يستر على اليهال و اليوم بسألهم شصار بلغت و الا لا خبري امس ضميرها ذابحها :S

Cr8ivia said...

The doctor

عساك من العايدين الفايزين يارب

Unknown said...

اول شى السالفة قوية وايد
ترى صج الوافدين قنبلى موقوتة العادات والافكار كل شى يختلف يعنى ما تقدرين تسوين كنترول عليهم
بس تبين الصج احنا اللى غلطانين


عساج تعودينه بالخير والصحة والسعادة والايمان

Cr8ivia said...

mishare

اتفق معاك .. الغلط منا :|

و عساك من العايدين الفايزين يارب

حياك الله

الاء سعود المجيبل said...

لا اله الا الله ....ولا حول ولا قوة الا بالله...!!


الله يهديهم والله حرام اللي قاعدين يسوونه بس تدرين تصرف الناظرة سخيف وما عجبني.!!!

um-miT3ib said...

tsk..tsk .. tsk

ghal6aneeeN maibalghoon khal isho7oona uho w ahala barra ildeera ;/

w ilnathra damha khaiifa 3la "sum3at" il madresa ma tkhaf 3ala sum3at.ha ihya w her students !!
begoloon itwazze3 bel madresa ;/

Cr8ivia said...

q8ya

اي والله شنقول غير لا حول و لا قوة الا بالله ! الله المستعان

حياج الله

um-mid3ab

اقصى شي سوته الاخت الناظره فصلت البنت من المدرسه .. طبعا الفصل مو وزاري و لا شامل يعني ببساطه بتروح تسجل بممدرسه ثانيه و كان الله غفورا رحيما

حياج الله نورتي