البريد و ما أدراك ما البريد!

السلام عليكم

فيني تحلطم له أول و ماله اخر على بريدنا العتيد !!

في الآونة الأخيره صارت لي تعاملات شبه يوميه مع البريد .. طبعا
خلوا البريد السريع من طقة دي اش ال و فيدكس و ربعهم

بريد الدوله سواءا

First class
او

EMS البريد الممتاز
ملوت الطرود .. آآآآآآه

1- المكان

للبريد الممتاز .. و خلافا لكل دول العالم المتحضره .. مكان
الارسال غير و مكان الاستلام غير

ناهيك ان الدولة كلها مافيها مكان استلام طرود الا واحد بمبنى
البريد الرئيسي بشارع فهد السالم

و الاستلام ايضا مكان واحد بكيفان !

طبعا خلوا الزحمه و الفوضى لهذا السبب .. المكان اشبة بمكان
مهجوووور .. تييك قمتة غير طبيعيه بمجرد ما تعتب عتبة باب المبنى

الاستلام في السرداب .. تحسه مكان ما تطور من ايام 1950..دثاره و
ساخه و فوضى

رفيجتي مره نزلت و انا انطرها بالسياره دقت علي من تحت تقولي
شنووو هذا ريحة فيران فيران !!

2- نظام يدوي

في دولة من دول النفظ الغنيه و اللي تعتبر من أغنى بلدان العالم
لازلنا اذا بنستلم الطرد .. ايبوون دستة ملفات و يدورون الرقم
فيها ..

و بما ان الملفات السود شكبرهم و بدون اي تنسيق فالهندي اييب 3 4
ملفات يقعد يدور بواحد و يقط عليك ملفين ثلاثه يقولك دور معاي

و الموظف العقيدي يا يشرب جاي و الا يخزز بالاوادم

و نادرا ما يمد يد العون و دايما على الفاضي الهندي افهم و ابرك
منه بمليون مره

ماكو شي اسمه كمبيوتر و قواعد بيانات و استعلام الكتروني و
هالخرابيط ! وين قاعدين؟

3- Tracking number

دولتنا التي تناطح السحاب .. بريدها ماعنده اونلاين سيستم عشان
الواحد يستعلم الكترونيا عن شحنته
عندك
Tracking number

بس ما منه فايده !! كل دول العالم البريد الممتاز له موقع
بالانترنت تدخل تتابع شحنتك وين وصلت و شصار عليها

ماعدااااا بريدنا

تبون تكحلون عيونكم بالويب سايت الرسمي مال بريدنا الممتاز؟

تفضلوا

http://www.mockw.net/post/
المشكله ما يستحون على ويوهم بعد حاطين لينكات البريد في الدول
المجاورة !!
شوفوا مال قطر
http://www.qpost.com.qa/

و الا مال الامارات
http://www.emiratespost.co.ae/

تبون السعودي؟
http://www.sp.com.sa/saudipost/arabic
و الا الامريكي؟
www.usps.com

الصيني ؟
www.ems.com.cn

طبعا كلهم فيهم اونلاين تراكينق و خدمات وانت قاعد ببيتكم و
البريد يوصلك لي باب البيت !

مو احنا يوصل البريد اليوم عقب عشر ايام يدقون عليك يقولون لك في
طرد لك تعال كيفان استمله!

و اوقف بهالطابور و الريحه و القمته و شوف من يعطيك ويه!

4- الجمارك

طبعا بعد طلوع الروح يطلعون لك طردك تاخذه من موظف البريد تروح
للجمارك

طبعا الجمارك عندنا ماشي على البركه و الأمزجه

نعم عادي جدا نفس الغرض اليوم تدفع عليه جمارك .. العصر مع موظف
ثاني يكون رايق يقولك ماعليه جمارك

عادي اذا بنهاية الدوام و موظف الجمارك ماله خلقك يقولك خلاص امش
امش و حتى ما يطل بالطرد و شنو فيه

و عادي اذا متعسر و متهاوش مع احد يطلع حرته بطردك و يفججه تفجج !

5- ساعات الدوام

طبعا الدوام الرسمي من 8 الى 1:30
ثم من 3:30 الى 7:30

بما ان ماعندنا نظام الكتروني و لا اكو اختراع اسمه كمبيوتر

فروحه العصر ما منها فايده

90% من روحات العصر

يقولك هاه؟ تعال الصبح مادري .. و طبعا ماكو دفع جمارك العصر فاذا
موظف جمارك العصر متعسر عليك
يحجز الطرد و يقولك تعال الصبح يشوفونه لك

اذا الطرد في الغرف اللي داخل يقولك تعال الصبح مو مسموح لما نفتح
الغرف

اذا ماكو و لاية او منطقه يقولك مادري تعال الصبح

اذا شافوا زول هندي سايق مطرشينه شي طبيعي يقوله ماكو ماكو ما وصل
و بقدره قادر لو اروح و اقوله دور انا متاكده واصل يطلع الطرد
محذوف داخل !!
و ما تفرغ الموظف ليلحين يسجله بالملفات السودا العملاقة !

طبعا شي ثاني .. شي طبيعي و عادي جدا تروح الساعه 12 باقي على
الدوام ساعه و نص يقولك لا ماقدر اطلع
شحنتك موظف الجمارك خلاص طلع
الدوام مو باقي عليه ساعه و نص؟
اي
ليش طلع؟
مادري !! جان زين مره و الا مرتين
لا هذا العادي .. اللي مو عادي انك تحصلهم بعد صلاة الظهر !!

جني وايد تحلطمت؟ بس والله هذا فيض من غيض على بريدنا !!

قريت في الجرايد انهم بيخصخصون البريد .. طبعا لازال قرار
بالادارج .. و حبر على ورق .. و قراراتنا يبيلها سنوات و سنوات عشان تطبق
فيبقى الحال على ماهو من سوء الى ان يشاء الله !

طواريها تهد الحيل

السلام عليكم

طائر بلا وطن : كا احمد رجع

على ذاك الرصيف أسهر وأنادي بكل الجنون القار...

أكلم شارع خالي سواده من سواد الليل..



ترى ماهو فلس ولا بقلبي قلت الأشعار..

ولكن واقعي يفرض علي أكتب بلا تعديل..



أنا راح العقل مني وعندي للجنون أعذار..

معاناتي إذا بوصف يفوق الوصف والتعليل..



من اللي قد وقف مثلي يواجه لعنة الأقدار؟!

رضى يبقى ويتحمل ...عشر أضعاف همه يشيل ..



من اللي ثبت أقدامه يقاوم شدة التيار؟!

ويعرف ان النخل وهو النخل راح وجرفه السيل..



من اللي حب له طفله وحلم من يوم كانوا صغار..

يتوج حبه بفرحه وأمه تحضنه بتهليل..



يمر الوقت وسنينه تمر ويستوون كبار..

ويتغرب لجل حلمه يسابق كل شباب الجيل..



ويرجع رافع راسه بعد ما صار هو طيار..

وبقى من حلمه الوردي زفاف يرفض التأجيل..



يجيها يقول حان الوقت تعالي نكشف الأسرار..

طفح كيل الصبر ماعاد في صبري وصبرك كيل..



ويذكرها بوقت صار مع مر الزمن تذكار..

بأيام الطفوله يوم يغرقها غلا وتدليل..



يمازحها وتردد له (ترى الكذاب يروح النار)..

يجافيها وتهمس له (أعرف أن الجفا تمثيل!)..



وتدمع عينهم لثنين يهلون الدمع مدرار..

ترى الذكرى ولو حلوه طواريها تهد الحيل..



وتسرح في وسط عينه ..تفكر .. ترتجف..تحتار..

يسألها عسى ماشر؟ ويطيح من ايديها المنديل..



وتنزل عالركب وتقول تسامحني على اللي صار؟

حشا والله ماخنتك ولكنه حصل تبديل..



تراها غيبتك طالت وتدري وقتنا غدار..

كبرت وخفت تتأخر وخير البر بالتعجيل..



ويشهق يلمح الخاتم ..يحس القاع تحته دار..

ولا يستوعب الموقف بليا شرح أو تحليل..



يسود الصمت..ولاكلمه ونظره كلها استنكار...

شلل صاب اللسان وصاب كفين العتب تكبيل..



دقيقه تمر..طعمها مر..نهاية عمر..موت أزهار..

خسارة حب ..ضياع فدرب..نار تشب..عذاب و ويل..



ويسرح لو بعيده تهون ولكن كيف بنت الجار..

ويكسر صمته بصرخه تعدت في مداها سهيل..



ويفقد وعيه وينزل على قاع الثرى منهار..

مصيبه كيف يتحمل؟! ترى ما بالأمر تسهيل..



مابينه وبين غرفتها ...ممر ونخله وجدار..

وهذا اللي يعذبه و يزود طينه بتبليل..



يشوف اللي سرق عمره سكن وياها نفس الدار..

غدى جار وله حق نزل في محكم التنزيل..



ويتخيله يغازلها ويقول أنه عليها يغار..

ويتردد صدى همسه ولمسه وضحكه وتقبيل..



يناظر دارها وفكره ورا ذيك الستاير حار..

وشباك الهوى عتمه بعد مازادوا التظليل..



يقرر زوجها يبني ويرفع مستوى الأسوار..

ويتصرف على كيفه عنده منهم توكيل..



ومكسور الجناح اللي بلا ذنب يذوق أمرار..

يصارع حسرته ويجر بعد ذيك الهزيمه ذيل..



يفكر كيف طاوعها الضمير تكون شي ضار..

بعد ما كانت لعمره عمر يحسب مداه طويل..



خذت كل مابقي منه ومن عقله خذت الأفكار..

وبرواز الوعد مايل خذته تخاف قال وقيل..



عطت بروازه لغيره وخلت في الحشا مسمار..

وآخر كلمه قالتها رجاءا ماأبيك تعيل..



ورد بكل غضب يسأل تحسبيني من أهل الثار؟!

أنا وقتي غدا ملكي ولا يتحمل التعطيل..



وداع الله وإذا بعدك مرض ايماني العطار..

أنا لي رب ما يهمل بقرا كتابه بترتيل..



وإذا كانت مسافات المنازل بيننا أشبار..

لخليها سفر أيام وأساوي كل شبر بميل..



وإذا قالوا علي مجنون أو ملبوس أو صابه زار..

لناجي شارع خالي لوحده في توالي الليل..



بقول ان الجنون أرحم كتبت من الجنون أشعار..

وصدق شعري يتحدى الذي قال الشعر تمثيل..



وأعيش العمر أرددها (ترى الكذاب يروح النار)..

براءة كانت الجمله ولكنه حصل تبديل..



حكاية عمري من يوم الطفوله لين صرنا كبار..

في هذي الصفحه شفتوها وعايشتوها بالتفصيل..



أبي شخص ينورني ومن أبياتي بس يختار..

حرف ماشكى من هم ويبشر مني بتعديل..



بعدها بعلن افلاسي وبترك عالم الأشعار..

لأني ماقدرت أعطي لحزني في الشعر تعليل..



وبرجع للسرير اللي من غيابي شكى محتار..

واريح عين شوهها سواد يشبه التكحيل..



وفي آخر بيت بسألكم عرفتوا ليش أناجي القار؟!

قولوا للثريا من تناجي لو خذلها سهيل؟!