Thursday, January 11, 2007

خيـــــانــــــــــــة !

مسااء الخير
!

I MISS YOU ALL
 
! كالعاده اكتب بوست و تطلع سالفة ثانيه بتاتا تكون اولى
 
 
 
 في وحده صار لها فوق ال 16 سنه متزوجه .. ريلها ظيم و متحملته اهوه و بلاويه عشان عيالها و بيتها .. و الاجر !

 
خالتها أم ريلها وياها بالبيت .. اهيه الل قايمه فيها و مراعيتها ..
الخاله كبيره و صارت وايد تنسا و تقط خيط و خيط الله يعطيها طولة العمر
المهم .. المره هاذي من سنين متعوده يوميا تروح احد دور القرآن تحفظ و تسمع و دروس
صار لها مدة ترد البيت خالتها أم ريلها تقولها اختج شتسوي عندنا بالبيت ! كل يوم رازوه ويها عندنا شتبي
المره مسكينه قالت هذي احد قطات و تخاريف خالتها فكانت تمشي وياها
في يوم المره حست انها مو اوكي بالدرس قالت برد البيت .. مع انها عمرها ما سوتها
 
صدمة عمرها يوم ردت و الا سيارة اختها ام 30 سنه و الغير متزوجه عند الباب!!
ماقدرت تنزل من السيارة .. حست !
 .. تمت تلف لما طلعت اختها ..
 
نزلت بيتها و الا ريلها بالشور بدلت و حطت الغدا و ناموا الظهر و كل شي كأنه عادي و اهيه طبعا تموت و تحيا من داخلها
 
العصر دقت سياراتها سلف و راحت بيتهم حق اختها ..
دشت عليها الدار و لا شعوريا ايدها على رقبتها
تقولها انتي اختي؟؟
من لحمي و دمي؟؟
مع ريلي؟؟
انا مابي شي؟
مو مصدقه قوليلي ان اللي شفته و حسيت فيه غلط و بصدقج!!
 
الاخت انهاااارت .. صياح و حاله و اعترفت انها على علاقة بريل اختها من مدة مدة!
صكت فيها الدنيا المره قامت تطقها لا شعوريا .. بينها و بين الينون شعره !!
 
 
اختها ! مع ريلها بو عيالها!
عيالها اللي بالجامعه!
و اختها اللي ربتها ويا عيالها!
يخونونها في بيتها .. في دارها .. على فراشها!
 
 
تحرم علي ريلها جذي !
 
 
أي عذر في الدنيا ممكن يغفر للإخت و الزوج فعلتهم؟
هذي أشياء تصير عندنا في الكويت؟؟
شنو هالحيوانيه اللي فهالحقير و الحقيره؟
قلوا الرياايييل تروحين حق ريل اختج؟
قلوا الحريم مالقيت الا خالة عيالك؟
شلون تحطين عينج بعين اختج و عيالها؟؟
شلون تحط راسك على المخده و تنام؟
 
 
ليلحين ماني قادره استوعب السالفة .. و لولا انها من ناس ثقه و معرفه شخصيه و الا والله ما صدقت !
 
 
---------------------
 
 
 
واحد ثاني .. طلق مرته أم بنته و ولده ..
ليش؟
صادها مع واحد!
منو هالواحد؟
هندي يشتغل عامل !!!!!!!
 
 
ينوا و قعدوا !! ينوا !!
 
 
مالقيتي الا هندي تخونين ريلج و بيتج و عيالج عشانه؟
هندي و الا غيره شلون شلون تخونين ريلج!
ريلها عاد سنع سنع!
 
 
-------------
 
 
 
واللي كان يكلم رفيجته الفير و طايحين له مغازل !
و يوم أذن الأذان صخ .. يقولها سبحان الله
صوت هالمؤذن عجيب عجيب
على كثر ذنوبي و اخطائي
صوته ينقيني ! و يخليني غصب اقوم اصلي
 
 
قالت له عاجبك صوته؟
قالها اقولج ماشاء الله عليه الله يحفظه عجيب و اعرفه ساكن بنفس شارعنا ريال و النعم تشوفين ويهه بس تحسين برااحه يا بخت اهله فيه
 
 
قالتله ترا هذا ريلي !!
 
 
سد التلفون و اهوه بعالي صوته الله يلعنح الله يلعنج!!
 
 

------------------
 
 
 
عياله طوله .. و مرته بالبيت .. و اهوه كل صبح في قهاوي هالمولات يرقم و يضبط !
الشيب تارس راسك و ريلك بالقبر و انت غرقاااان غرقاان!
 
 
توه متزوج ماصار له سنه .. و ليلحين شغله الشاغل البنات و مواعد البنات !!
 
 
-----------------
 
 
 
لحد يقولي مرته مو مهتمه فيه ..
مرته مو معطيته حقه
مرته حنانه
مرته نسره
 
 
مافي أي عذر بالدنيا يبيح له خيانة مرته !!
 
 
عقوبته بالشرع الرجم !! يعني متساوي مع القاتل !!
الشرع حلل لك 4 ..
حط فوقها 3
اشرف لك مليون مره من انك تنزل الى مستوى الحيوانات هذا !
عز الله الحيوانات عنهم!!!!
 
 
---------------
 
 
 
و اهيه بعد
لا تقولين ريلي مهملني
ريلي ما يدري عني
ريلي و ريلي
فعلته و تركته!
تطلقي !!
صبري !!
حاولي !!
اشرف لججججججججججج من خيانة زوجج !!
المرأه اللي في زمن الرسول عليه الصلاة و السلام بعد الحديث عن النهي عن الزنا و عقوبه الزانيه
تعجبت تعجبت
اوتزني الحره؟؟
 
 
ليتها تيي تشوف !!!!
 
 

الله يهدينا و يهديهم .. و يستر علينا و عليهم!

36 comments:

lawyer said...

واااااااااااي
عفستينا
لحظه لحظه

شنوووووووووووو هذا

الحقيرررررررررره

مع خاله عياله

الله ياخذه انشاء الله
انا لو منها اذبحهم



صدمتي الثااااانيه

الي قريتها عشر مرات

مرت المؤذن و الريال !!

ياربييييييييييي
ياربي
يا ربي
ارحمناااااااااا

7osen said...

الصراحه سوالفج هذي تشيب الراس

الله يعين بس الله يعين

do0da said...

:r al7een hadatna shahar 3ashan t7ab6eena chithi

5ala9 manabi nitzawaj :p

Dakhtour said...

Wallah shagolech sowalef o mashakel el 7areeem ma etkhale9 :P

Mamloo7a Q8ia said...

حسبي الله ونعم الوكيل
هذه آخر الدنيا
اختها؟؟؟؟
وااااي شلوووووون؟؟؟
انا ما اتقبل ان الزوج يتزوج اخت مرته بعد وفاتها هالمره خيانه على حياتها
شوفي انا ما اتقبل الخيانه بكل انواعها ولا اتقبل اي عذر للخيانه
الله يستر علينا وعلى المسلمين
ويثبتنا على ديننا ويطلعنا منها مسلمين

Unknown said...

مجمتعنا منحط وكل الناس تغلط بدون استثناء وهذا من طبيعة البشر
بس الواحد يدعى حق نفسه وحق الناس ان الله يصلح الجميع

اما مسألة الخيانة فالشاعر يقول
لا يغرك الزول ترى الزول خوان
:)

وخلج متفائلة ترى الدنيا فيها خير وناس صالحين

Loura said...

Ana atmanna ennah hal 7achy kila suwalif o 5arabee6.. :s lanny ma atsawar ennah fee dana2ah filbany adam tosal hal mustawa.

Allah y7afithna min hal5araab ameen.

ReLaaaX said...

من الصدمة مااقدر اعبر سامحيني :(((


انزين لييييش؟!؟

Expatriate said...

الله يرحمنا برحمته ويحفظنها ويحفظ اهلنا

لذلك عقوبة الزاني المحصن الرجم حتى الموت علنا امام الناس علشان يكون عبرة لمن لا يعتبر .. عقوبته اشد من القاتل مثل ما ذكرتي .. وحجم الجريمة يقاس بحجم العقوبة

طبعا هناك اسباب اخرى وراء انتشار هالفاحشة بين الناس .. منها عدم ستر النساء وتساهلهم بالخلوة مع الرجال وعدم انشغال الرجال والحريم بالعبادة و ان الصلاة تنهى عن الفحشاء والمنكر

لكن لا .. الناس ما تبي حشمة ودين والتزام .. تبي وناسة وطلعات وفري وشفيها يتغدون الرجال والنساء مع بعض اختلاط في الشاليه و المخيم والعزايم ؟ كلهم يصيرون حق بعض ..
شدعوة جذيه هالحجارة ؟
طبعا هالقصص غيض من فيض .. وما خفي اعظم ... الاف القصص خيانة الزوج مع الخدامة و الولد مع الخدامات
صاروا الشباب يتفاخرون بالزنا بالدواوين واليمعات ..
والبنات اكثر واكثر ..

albandry said...

هذا من علامات يوم القيامة كثرة الفاحشة

اللهم استر علينا وعليهم

بس وقف قلبي من مرت المؤذن

لا حول ولا قوة اللا بالله

Breeze said...

أخيراً رديتيييييييييي :@ :@ !!! لووول يعني معصبة !!!

والله عيزت وأنا أنطر !!!!!!! بالأخير قلت هذي علقتنا و نست .. لووول

--

تدرين عاد ليتني ما قريت هالبوست :( إحتريييييييت .. لا تشوفين شكلي وأنا أقرى .. أمبييييييه .. لاء لاء لاء .. شنوووووو ؟؟؟؟؟ @@

لوووول

على قولتج الله يهديهم و يهدينا !! ويستر عليهم وعلينا ..

يعطيج العافية على هالنصايح الثمينة :))

shakshaka said...

yalllaah yarab et3afeehum wala teblana estaghfaralla! allah layableena enshalla..

Omtantoo7 said...

waaaaaaaai yommmaaaa kash sha3ar yanbi ! ish'hal ashkal ge6ee3a?! ish'hal araf?!! sick people walla.. 3ala golat mama 3oda: yaallla sitrik;p

KQ8 said...

انا اقول ماكو دخان من غير نار

ومافيه شي منيه والطريج يصير الا في الحالات النادره

ومع هذا..الخيانه امر مرفوض بقاموسي واكرهه ولا احبه ومها كانت الظروف مالها او له اي يعذر يرتكب هذا الجرم

سالفة قلب said...

احفظ الله يحفظك

هذا شعار حياتي

ذنوب الخلوات أصل الانتكاسات
وعبادات الخفاء أعظم أسباب الثبات
ابن القيم

PearL said...

انتي قلتيها

عز الله الحيوانات عنهم!!!!

قمة في القذارة والانحطاط والوصاخة

كلهم بدون استثناء

الشخص اللي يوصل فيه انه يخون مرته مع اختها
ولا المرة اللي تخون ابو عيالها مع هندي

ولا اي احد

الحيوانات احسن منهم

مادري شصار بالدنيا

تصدقين
المشكلة ان الخيانة الحين منتشرة بشكل غير طبيعي بين الازواج

سواء مرا او ريال

عيب والله عيب

Mudhaf said...

هذا دخولي الاول لمدونتج و بالتاكيد ماراح يكون الاخير :)
ذكرتيني بالمرأه اللي مر على بيتها عمر بن الخطاب و سمعها تقول
تطاول هذا الليل و ازور جانبه
و ليس الى جنبي خليل ألاعبه
فوالله لولا الله لاشيء غيره
لزعزع من هذا السرير جوانبة
مخافة ربي و الحياة يكفني
و أكرم بعلي أن تنال مراكبة

وين الحياء و وين مخافة الله و المحافظة على الزوج الحين

عزوبية و بس

3ateeja said...

تصدقين مره سوو استفتاء بلكويت على حريم وايد ...
اي افضل لج زوجج يخونج ولا يتزوج عليج تدرين شنهي النتيجه
اكثر من 70% قالوا يخوني
؟؟؟؟!!!!!!!!!!!!!!!!!!!!!!!

SAJA.S said...

قلتي اللي انا دايما اقوله .. المره اللي تخون مالها حجه ولا سبب

Kuw_Son said...

سوالف تهز الجبال !! الله أكبر !!

barrak said...

اللي اختشوا ماتوا

78o8eYa said...

!!

.....


://


No Commentz !!

نون النساء said...

مو معقوول جذي

@@

هذا صج

لالا صج صج يعني كريتيفيا
هذول موجودين يعني أوادم صج صج

@@

؟؟؟

Cr8ivia said...

zhouhui731

thanks (:


-----------

Lawyer

ايه والله

ياربي ارحمنا :|


-----------

7osen

الله يستر :|


-------------

doOoda

heheheh shsawe men 7er ma feni :S
ee me too me too


-------------

Zizotime

ism Allah 3laikum intaw 3ad imgasreen :s

Cr8ivia said...

Ghasheema

yes shay moqazez o mo'eref o eylawe3 ilchabd!

eee ili rayelha moa'athen ana tamat safna esbo3 3ogob ma sema3t ilsalfa :| Allah eykafeena ilshar ..
and yeah SURE il molam both ilrajol wel mara'ah ..
yeah ghasheema but it seems bad ppl are incresing rapidly :s


-------------


Mamloo7a Q8ia

بالضبط !
انا دايما اقول شلوووون يتزوجون ريل اختهم حتى لو توفت شي كبير !
فما بالج بخيانه
الله يستر علينا و عليهم!
آمين يارب


--------------------

mishari


الكل يغلط صح
لكن غلطه عن غلطه تفرق
في غلطات يغلطونها البشر
لكن في غلطات تنزل مستوى الادمن من الادميه الى الحيوانيه
يعني هالغلطات جايده حقيره!

فيها اكيد بس للاسف في تراجع مستمر
الله يستر


-------------


Loura


هالحجي كله واقع و حقيقه 100%
مع الاسف الشديد طبعا :|

آمين


-----------------


ReLaaaX


مالومج والله ما لومج :|

Cr8ivia said...

Expatriate

صحيح .. ليتهم يستوعبون حجم جريمتهم !

الاسباب اللي ذكرتها اكسب ممكن تكون عامل مساعد لكن ابدا مو عامل رئيسي في الخيانه ..
ربينا مع بعض .. و اهلنا ماعندنا فصل الحريم عن الرياييل و البنات هم الشباب
لكن مجرد الفكره لا تخطر على بال
لان الاساس نظيف!
صحيح ماخفي اعظم

الله يستر علينا و يرحمنا برحمته


-------------------


البندري


فقدتج جم بوست ما مريتي علينا :)

اي والله .. الله يستر علينا و يرحمنا برحمته


--------------------

Breeze



ههههههههه اعصابج اعصابج
لا لا مانساكم شدعوه :)
ناسيه باسوردي كنت بس ههههه

آمين يااارب


--------------------


shakshaka


آمين
آمين
:(

------------------

omtantoo7

eee walla ya om tantoo7
YAAAALAAAH SITRIK !!

Cr8ivia said...

Krakatoa


شنو النار اللي ممكن يصير يعني؟
والا لو جهنم الحمرا ما عذرتهم على اللي يسوونه!!

مالها عذر ابد ابد جريمه لا تغتفر!


--------------------


سالفة قلب

اي والله يا سالفة
احفظ الله يحفظك
الله يحفظج و من تعزين يارب

و مقوله ابن قيم جدا قيمه!


-----------------


PearL

صحيح .. كلهم كلهم

هذا اللي يذبح انها منتشره
و خوفج تصير ظاهره عاديه

الله يستر

----------------


Mudhaf

حياك الله اولا و نورت البلوق :)
والله العزوبية راحه بس هم الزواج سنة الحياة
و الابيات و الموقع اللي حطيته قمه !
الله يسترررر


--------------


3ateeja


مياااانين و خبول !!
ذكرتيني في مسلسل عديل الروح
لما يات البنت حق امها قالت لها ابوي عنده علاقة بوحده
قالت له عادي شعلي منه ان شاء الله عشر
قالت لها ما تخافين يتزوج عليج!
قالت لا عاد هني و حده زواج لااا شيقولون عني الناس و فلانه و علانه! بيلعب بيتسلى كيفه مرده لي

منطق حقير!!

Cr8ivia said...

Smile

حتى الريال !!


---------------


Kuw_Son

الله يستر :|


----------------

barrak

من زمااااااان :|


-------------


78o8eYa

مالومج والله
سوالف تربط للسان :|


-------------

نون النساء


أوادم عايشين معانا للاسف
صجيين :|
بس مستواهم ابدا ابدا
مو مستوى اوادم بشر

يالله الستر و العفو و العافية

san3a_wa_laken said...

عسنا ما انشوفنا في حياتنا
الا الخيانه عاد شى لا يمكن ان نستحمله
او نتحمله
عسى الله يهدي الجميع
ما اتخيل وقاحه المراه اللى متزوجه وتخون
والريال اللى متزوج ويخون
شى فظيع

Purplecious said...

وااااااي

يالله سترك و عطفك و لطفك

الله يهداج شنو هالسوالف اللي تشيب الراس!!!!!!!؟

لا حول و لا قوة الا بالله

يا زيني و أنا قاعده ببيتي لا اسمع و لا ادري عن هالسوالف

لااااااا

ترى ما راح ازور بلوقج اذا شفت سوالف من هالنمونه مره ثانية

Cr8ivia said...

san3a_wa_laken


الله يبعد شرها عنا و عنكم و عن الجميع يارب
آمين


----------------

Purplecious

لا لا لا كلش و لا طلتكم عاد :(
توبه
البوست بعد شوي ان شاء الله خفيف مافي مآسي :D

Anonymous said...

الله يكافينا الشر


ما في انسان يقول يا الله أنا بخون

هناك عوامل نفسية و اجتماعية تكون هي مفتاح الباب و لي انفتح الباب يصعب سده

هذا مو تبرير لكن
ممكن أي واحد فينا ينحط بظروف او احوال تكون اقوى منه

وقتها بردد ما كنت احس بنفسي
ما كنت اقدر اوقف ادري انه غلط بس مو بيدي اوقف هالشي


صح لازم ننكر و نستجهن الوضع
بس اللي اهم من هذا
ان ندعي الله يحفظنا و يثبتنا و يرزقنا العفة و الطهارة
و مو بس جذي
احنا بعد لازم نتعفف و نغض البصر و نحط مليون قفل و قفل على الباب قبل لا ينفتح
الله عطانا ظوابط و قيم مو لان بقيدنا و لا بصك علينا
لكن عشان يحمينا من هالبلاوي





m

Cr8ivia said...

anonymous
m

آمين يارب

معاك بكل اللي قلته

الاء سعود المجيبل said...

انا سمعت سوالف من اشخاص ابنفسهم خانوا واللي خانوهم اقرب الناس لهم والله حطيت ايدي على قلبي وانا اسمعهم يتفاخرون بهالشيء !!!

حسبي الله ونعم الوكيل والله يستر علينا كلنا..:)

Cr8ivia said...

q8ya

لا عاد اسمعهم بنفسي باقرب ماعندي على روسهم :|

Ahmed said...

إختي العزيزة
الواحد نادرا ما يسمع هالسوالف و لا يبي يسمعها صج أنا كلش ما أسمع جذيه و لمن قريت كلامج صكت فيني الدنيا بلزززز لا تكتبين هالسوالف لأنها صج تظر و ما تفيد